Federata Shqiptare e Futbollit ka shprehur mirënjohjen e saj të thellë për të gjithë tifozët shqiptarë, duke vlerësuar sjelljen shembullore dhe mbështetjen e jashtëzakonshme të treguar gjatë ndeshjeve kualifikuese të Kupës së Botës 2026. Sipas FSHF-së, atmosfera pozitive dhe energjia e tifozëve në stadiumin “Air Albania” kanë reflektuar një kulturë të re sportive që po ndërtohet në vend.
Federata thekson se progresi i dukshëm në sjelljen e tifozerisë është vlerësuar edhe nga institucionet ndërkombëtare. Për ndeshjen Shqipëri–Angli, të vlefshme për Botërorin 2026, Komisioni Disiplinor i FIFA-s ka vendosur një gjobë simbolike prej vetëm 2250 frangash zvicerane, si pasojë e një incidenti të izoluar. Ky vendim konsiderohet një tregues i qartë i përmirësimit të ndjeshëm, sidomos në krahasim me dënimet e forta të viteve të kaluara.
FSHF bën të ditur se incidentet gjatë ndeshjeve kanë qenë minimale dhe se sjellja e përgjithshme e publikut është vlerësuar si pozitive. Aktualisht, Shqipëria renditet në vendin e 50-të në klasifikimin “Fair Play” të UEFA-s, pozicion që dëshmon përparim të konsiderueshëm, por që sipas Federatës shërben edhe si motivim për të synuar vendet më të larta.
Federata Shqiptare e Futbollit i inkurajon tifozët shqiptarë që të vazhdojnë të mbështesin Kombëtaren me të njëjtin sportivitet dhe qytetari, duke forcuar imazhin e Shqipërisë në arenën ndërkombëtare dhe duke kontribuar në krijimin e një atmosfere të sigurt, të disiplinuar dhe pozitive në çdo ndeshje.
