Cristiano Ronaldo ka bërë të qartë se Kupa e Botës 2026 në SHBA, Kanada dhe Meksikë do të jetë pjesëmarrja e tij e fundit në turneun më të madh të futbollit.
Megjithatë, ish-shoku i tij te Portugalia, Nuno Gomes, beson se edicioni i vitit 2030 – i cili do të zhvillohet në Spanjë, Portugali dhe Marok – do të ishte mundësia perfekte që Ronaldo të mbyllë karrierën “në shtëpi”.
Edhe pse tashmë 40 vjeç, ylli i Al-Nassr vazhdon të mahnitë me formën e tij fizike dhe profesionalizmin e jashtëzakonshëm.
Statistikisht, vitet e tij pas të 30-ave kanë qenë edhe më të fuqishme se dekada e parë e karrierës, por CR7 ka insistuar se ky Botëror është shansi i tij i fundit për lavdi globale.
Gomes, i cili ka luajtur 34 ndeshje në krah të Ronaldos, tha për TalkSport se vetëm vetë Ronaldo e di nëse mund të luajë deri në 2030, por theksoi se ai ende është në gjendje të shënojë – gjëja më e rëndësishme në futboll, përcjell Gazeta Express.
Megjithatë, për momentin, Ronaldo mbetet i vendosur: Botërori i ardhshëm do të jetë akti i tij i fundit në skenën botërore.
