Gazetarja thotë se kalimi i ish-sekretarit të MSh-së në listat zgjedhore të VV-së krijon perceptim për lidhje politike brenda administratës.
Gazetarja Saranda Ramaj ka reaguar pas kandidimit të Naim Bardiqit për deputet nga radhët e Lëvizjes Vetëvendosje. Bardiqi, i cili më parë ka shërbyer si Sekretar i Përgjithshëm në Ministrinë e Shëndetësisë, është përfshirë në listat zgjedhore të VV-së vetëm katër muaj pas përfundimit të mandatit të tij në administratë.
Sipas Ramajt, ky hap nuk i sjell nder as Bardiqit dhe as partisë që e ka nominuar.
“Fakti që ish-Sekretari i Përgjithshëm i MSh, Naim Bardiqi, figuron në listat e VV-së vetëm katër muaj pas përfundimit të mandatit të tij, nuk i bën nder as z. Bardiqi e as partisë që e ka nominuar. Përkundrazi, e ushqen perceptimin se pozitat e larta në administratë janë të lidhura ngushtë me pushtetin politik dhe se ruajtja ose avancimi profesional varet nga afërsia me qeverinë. Në një administratë moderne, mesazhi që duhet me e dhënë është krejt i kundërt. Nejse,” ka shkruar Ramaj.
