Kandidati për deputet nga radhët e Aleancës për Ardhmërinë e Kosovës, Daut Haradinaj gjatë ditës së sotme ka vizituar një kompani private duke theksuar se tre vëllezërit të cilët janë pronarë të kësaj kompane, kanë dhënë një kontribut të madh në zhvillimin ekonomik të vendit.
Haradinaj tha se këta janë patriotët e ditëve të sotme të cilët punësojnë qytetarët, mbajnë gjallë familje e zgjerojnë tregun vendor. Ai tha se pa sektorin privat nuk do të mund të ketë ekonomi të fortë, nuk do të ketë zhvillim dhe të ardhme të sigurt.
Postimi i plotë:
Muhamet, Refik dhe Fikret Havolli janë shembull i qartë se puna, përkushtimi dhe vizioni ndërtojnë sukses të qëndrueshëm. Si vëllezër, e ndërtuan nga e para kompaninë e tyre Passable, duke krijuar dhjetëra vende pune dhe duke kontribuar drejtpërdrejt në zhvillimin ekonomik të vendit.
Këta janë patriotët e ditëve të sotme. Njerëz që punësojnë qytetarët tanë. Mbajnë gjallë familje. Zgjerojnë tregun vendor. Forcojnë buxhetin e Kosovës përmes taksave. Pa sektorin privat nuk ka ekonomi të fortë. Nuk ka zhvillim. Nuk ka të ardhme të sigurt.
Aleanca do të jetë gjithmonë krah sektorit privat. Krah afaristëve që me punën e tyre e përfaqësojnë Kosovën me dinjitet. E bëjnë krenare në çdo treg botëror. Kudo që prezantohen.
