Presidenti amerikan Donald Trump ka thënë se SHBA-ja do ta mbajë ose do ta shesë naftën bruto që mbahet në cisternat që ka sekuestruar në brigjet e Venezuelës, si dhe vetë anijet.
Komentet e presidentit amerikan erdhën ndërsa Uashingtoni vazhdon të ushtrojë presion mbi udhëheqësin e vendit të Amerikës së Jugut, Nicolás Maduro, që të japë dorëheqjen.
Duke folur me gazetarët në Florida të hënën, Trump tha për naftën “ne do ta mbajmë”, duke shtuar: “Ndoshta do ta shesim, ndoshta do ta mbajmë. Ndoshta do ta përdorim në Rezervat Strategjike. Ne do t’i mbajmë edhe anijet”.
Administrata Trump ka akuzuar Venezuelën se përdor të ardhurat nga nafta për të financuar krimin e lidhur me drogën, ndërsa Karakasi i ka dënuar sekuestrimet si “pirateri”.
Ushtria amerikane ka sekuestruar dy cisterna nafte këtë muaj, përfshirë një të shtunën, shkruan BBC, transmeton Gazeta Express.
Trump lëshoi paralajmërimin e tij të fundit ndërsa Roja Bregdetare e SHBA-së vazhdoi të ndiqte një cisternë të tretë nafte, të cilën autoritetet e përshkruan si pjesë të një “flote të errët” venezueliane të përdorur për të shmangur sanksionet e SHBA-së.
“Po ecën para dhe ne do ta marrim atë”, tha Trump.
Veçmas të hënën, ushtria amerikane tha se kreu një sulm ndaj asaj që e quajti një anije të dyshuar për trafikim droge në ujërat ndërkombëtare në Paqësorin lindor. Komanda Jugore e SHBA-së tha se një person u vra.
Kur u pyet nëse qëllimi i sekuestrimeve ishte të detyronte Maduron të largohej nga pushteti, Trump u përgjigj: “Epo, mendoj se ndoshta do të… Kjo varet nga ai se çfarë dëshiron të bëjë. Mendoj se do të ishte e zgjuar për të ta bënte këtë. Por përsëri, do ta shohim”.
SHBA-ja ka ndërtuar praninë e saj ushtarake në Detin Paqësor dhe Karaibe dhe kanë kryer sulme vdekjeprurëse ndaj anijeve të dyshuara venezueliane për kontrabandë droge, duke vrarë rreth 100 persona.
