Kandidati i Aleancës për Ardhmërinë e Kosovës (AAK) për deputet, Kushtrim Xhemaili, ka reaguar ashpër ndaj situatës energjetike në vend, duke akuzuar qeverinë për dështim në menaxhimin e krizës së energjisë dhe për neglizhencë ndaj qytetarëve dhe bizneseve.
Përmes një reagimi publik, Xhemaili ka theksuar se reduktimet e shpeshta të energjisë elektrike po e bëjnë jetën e qytetarëve të padurueshme, duke detyruar familjet dhe bizneset të blejnë gjeneratorë për të përballuar mungesën e rrymës. Sipas tij, është e papranueshme që në vitin 2025 qytetarët e Kosovës të jetojnë në errësirë dhe të mbështeten në zgjidhje primitive për nevoja bazike.
Ai ka kritikuar ashpër edhe paralajmërimet për rritje të çmimeve të energjisë, duke vlerësuar se qeveria, në vend që të ofrojë zgjidhje konkrete, po e transferon barrën financiare te qytetari. “Ju në dritë, qytetarët në errësirë”, ka qenë mesazhi i tij, duke aluduar në pabarazinë dhe keqmenaxhimin institucional.
Xhemaili ka shtuar se përfitimi nga blerja dhe vjedhja e energjisë, sipas tij, po tolerohet, ndërkohë që qytetarët e ndershëm po përballen me pasoja të rënda ekonomike dhe sociale. Ai e ka cilësuar gjendjen si të mjerueshme dhe ka kërkuar përgjegjësi politike për krizën energjetike.
Kushtrim Xhemaili është kandidat i Aleancës për Ardhmërinë e Kosovës (AAK) për deputet në zgjedhjet parlamentare të 28 dhjetorit, ku në listën zgjedhore mban numrin 33, duke e pozicionuar çështjen e energjisë dhe mirëqenies së qytetarëve si një nga temat kyçe të angazhimit të tij politik.
