Prishtinë – Prindërimi në Kosovë po zhvillohet gjithnjë e më shumë nën presion të vazhdueshëm psikologjik dhe social. Sipas Dr. Ferid Aganit, ish-ministër i Shëndetësisë dhe psikiatër me përvojë të gjatë klinike, prindërit sot nuk po përballen me vështirësi sepse nuk duan apo nuk përpiqen mjaftueshëm, por sepse sistemi shëndetësor dhe social i ka lënë pa mbështetje reale.
“Sot në Kosovë, shumë prindër po rrisin fëmijë nën ankth – pa ndihmë profesionale, pa udhëzim dhe pa përkrahje institucionale”, thekson Agani.
Ai vlerëson se prindërit përballen çdo ditë me stres ekonomik dhe pasiguri sociale, presion të vazhdueshëm për sukses dhe perfeksion, mungesë të shërbimeve mbështetëse psikologjike, psikiatrike dhe sociale, si dhe frikë reale për të ardhmen e fëmijëve të tyre.
Sipas Dr. Aganit, pasojat e kësaj gjendjeje tashmë janë të dukshme dhe po reflektohen në gjithë shoqërinë. Lodhja dhe djegia emocionale te prindërit, tensionet dhe konfliktet familjare, si dhe rritja e fëmijëve më të pasigurt dhe më të ekspozuar ndaj problemeve të shëndetit mendor janë sinjale alarmi që nuk mund të injorohen më.
“Kjo nuk është dështim individual i prindërve. Është, para së gjithash, dështim i politikave publike”, thekson ai, duke shtuar se një shtet që nuk i mbështet prindërit, dëmton drejtpërdrejt brezin e ri dhe të ardhmen e vendit.
Në angazhimin e tij politik dhe profesional, Dr. Agani propozon masa konkrete për ta kthyer shtetin në përkrahës real të familjes. Ai angazhohet për ofrimin e këshillimit profesional prindëror në komunitet, me qasje të lehtë në qendrat kryesore të mjekësisë familjare dhe qendrat e shëndetit mendor, si dhe për zhvillimin e programeve publike për prindërim të shëndetshëm dhe pozitiv.
Po ashtu, ai kërkon mbështetje psikologjike për prindërit që përballen me stres kronik dhe krijimin e shërbimeve pa stigmatizim, pa burokraci dhe afër familjes.
“Ne nuk u kërkojmë prindërve të përballojnë më shumë. Ne ndërtojmë politika që i mbështesin realisht”, thekson Agani.
Sipas tij, prindër të mbështetur sot do të thotë fëmijë më të shëndetshëm nesër dhe një shoqëri më e fortë e më e qëndrueshme në të ardhmen.
Dr. Ferid Agani është kandidat me numrin 9 në listën e Lidhjes Demokratike të Kosovës (LDK), duke e bazuar angazhimin e tij politik në përvojën profesionale dhe në nevojën për politika publike që e trajtojnë shëndetin mendor dhe familjen si prioritet shtetëror.
